انا الماضي 
انا الآتي 
انا الي زرعت مشكاتي 
بقلب الليل 
لقيته صباح

انا الي جعلت الحب … حدوته
قطفت التوت
توته تلتقي بتوتة
وقلت أموت 
وقلبي براح

انا دمعة
على الخدين كانت بتسيل
انا شهقة وجع جاري
كنهر النيل
انا الي بغيب ومش برجع
ولما يخبطوا بسيرتي 
وجع في غيابي يتجمع
يقولوا بقى 
يا ريته ما راح

انا المنسي
على اصوله 
انا الماشي 
على السكة
انا المرتاح

‏الاولة وحدك .. 
والتانية حدوتة … 
والتالتة هتشكي لمين؟

الأولة وحدك مفيش أصحاب … 
والتانية حدوتة آخرها خراب … 
والتالتة هتشكي لمين؟ حبيبك غاب…

‏الأولة وحدك مفيش أصحاب، ولا عندك أمل تلقى صحاب تانيين…
والتانية حدوتة آخرها خراب، وتزهق من الشكوى ومن اللايمين … 
والتالتة هتشكي لمين؟ … حبيبك غاب وبعد ما كنتم سوا بقيتوا اتنين…

‏الأولة وحدك مفيش أصحاب، ولا عندك أمل تلقى صحاب تانيين، وليه تلقى … 
والتانية حدوتة آخرها خراب، وتزهق من الشكوى ومن اللايمين، وتتعود على الفرقة… 
والتالتة هتشكي لمين؟ … حبيبك غاب وبعد ما كنتم سوا بقيتوا اتنين، محدش في الزمن يبقى ..

‏الأولة وحدك مفيش أصحاب، ولا عندك أمل تلقى صحاب تانيين، وليه تلقى وكل الي التقوا سايبين؟
والتانية حدوتة آخرها خراب، وتزهق من الشكوى ومن اللايمين، وتتعود على الفرقة وتصبح تتلهي بتفانين.
والتالتة هتشكي لمين؟ حبيبك غاب وبعد ما كنتم سوا بقيتوا اتنين، محدش في الزمن يبقى، وليه تفكر بناس ناسيين؟